Cosmoglotta B 1: Januar-Februar-Marte 1935

P.1

COSMOGLOTTA - INFORMATIONES
Numero l Januar-Februar-Marte 1935.

Apari durant chascun trimestre quam suplement a Cosmoglotta printat
Redaction e Administration: Occidental—Buro, CHAPELLE (Vaud), Svissia.
Precie de abonnament, junt con Cosmoglotta, por 1935 : Fr. 3,50 sviss.

A NOR LETORES !
Alcunes va esser probabilmen astonat reciver un jurnal mimeografat. Noi deve dar les un explication. In ultim témpor, de pluri láteres on ha preocupat se pri li fate de Cosmoglotta, quel, pro li actual desfacil economic circumstancies, suffre un poc pro li crise. On ha proposit restricter li edition printat e dar li Cronica e diversi informationes per mimeograf. Specialmen sr. Fritzsche de Leipzig in un circulare studiat li maniere passar li témpor de crise economic sin damage.

Li custas de printation de Cosmoglotta in Svissia es li max bass possibil. Noi deve constatar, pos comparation de precies, que on ne posse obtener in altri landes plu bass connitiones. Do on deve lassar li printation in Svissia. Ma sr. Fritzsche proposi:

"Un reduction del print—custas va esser possibil si noi prende li resolution printar omni duesim numero de Cosmoglotta per li mimeograf-machine quel have li Occidental-Buro in Svissia. To vole dir que noi intercala inter omni du numeros tipografat un numero multigrafat in 11 maniere del antean revue "Helvetia".

Respondent a ti circulare, sr. E. de Wahl scri:

"Anc li idé alternar printat Cosmoglotta con mimeografat numerós es a considerar. Sembla me, que it vell esser bon dar different nómines a ti du species pro continual numerós del printat edition. Tande on posse reservar li mimeografat por nor comunicationes al coidealistes, polemicas, intern questiones, etc. i.e to quo es destinat por li extern propaganda. In li printat edition on vell scrir to quo es destinat por li grand publica e li ancor ne firm coidealistes, do articules de prepaganda, clarationes de singul paroles o grammatical formes e incertitás (quam nu in li "linguistic responses”) "

Noi agnoscet que ti propositiones es just. Do, con li aprobation del principal ductores, noi decidet editer in 1935
6 numerós de Cosmoglotta sur l6 pagines tipografat
4 numerós de Cosmoglotta-Informationes mimeografat
= 10 numerós por li annu.
Per ti arrangement, noi publica in Cosmoglotta-Informationes li Cronica, li communicationes del societés national, li adresses, etc. omnicos, quo perdi su valore yes quelc témpor, durant que in Cosmoglotta tipografat noi publica li articules havent un interesse permanent, quo permisse publicar li cadernes por formar un libre ne contenent alquó obsolet.

Li edition tipografat es inviat chascun vez a mult adresses por gainar nov abonnates

Li edition mimeografat es inviat solmen al abonnates e al membres del landal societés. A it, noi junte si possibil li circulares e organes del societés national.

Noi peti li responsiv persones del landal organisationes benevoler colaborar con nos por dar nos li necessi informationes concernent lor respectiv land. Li Federationes quel edite folies mimeografat (Svedia,

P.2

Tchekoslovacia, Francia), reproductet per altri medies (Germania) o mem printat (Anglia) vell posser adjunter lor editiones a Cosmoglotta-Informationes. Tis qui scri lor textus sur matricies, posse inviar nos li matricies; li altris posse inviar li folies printat.

Li format deve esser 210 x 297 mm. (Sam format quam Cosmoglotta-Informationes. Noi besona 300 exemplares. Li textus deve arivar 15 dies ante li aparition de Cosm.-Inf. - Ples dar nos li complet adresses del membres de vor associationes. Si possibil, ples scrir les per scri-machine con 4 copies per carbone, sur glutinat papere. To va facilisar nor labor!

SOCIETÉ DE GARANTES POR "COSMOGLOTTA"

Secun proposition de quelc coidealistes, un societé de garantes por assecurar li edition de Cosmoglotta (e Cosm.-Informationes) esset fundat.

Li regulament es includet in li present caderne de Cosmoglotta-Informationes. Noi espera que ti societé va incontrar li general aprobation e que omni coidealistes de quel li situation financial permisse to, va subscrir adminim un parte de Fr. 10.- sviss.

Noi memora que li aquisition de 3 nov abonnates a Cosmoglotta coresponde a un parte del societé de garantes por quel li aquisitor recive li membratu.

Li jure del membres del Societé de garantes es:

a) Reciver duplic abonnament (3 exemplares) si ili expresse ti desire. b) Reciver li contos de Cosmoglotta. c) Expresser al presidente del societé de garantes lor remarcas pri li contos de Cosmoglotta. d) Votar pri important decisiones concernent Cosmoglotta.

Li payament de chascun parte de Fr. 10.- sviss da li jure de un voce por li votationes.

Li nómine del subscritores es publicat in Cosmoglotta-Informationes.
Vi li unesim liste de subscritores:

1. Ric Berger, Morges (Svissia) -- 1,2,3,4,5 -- Fr. 50.--
2. Fred Lagnel, Chapelle (Svissia) -- 6,7,8,9,10 -- Fr. 50.--
3. Josef Svec, Praha (Tchecoslovakia) -- 11,12 -- Fr. 20.--
4. L.M. de Guesnet, Paris (Francia) -- 13, 14 -- Fr. 20.--
5. Gerald A. Moore, London (Anglia) -- 15, 16, 17 -- Fr. 30.--
6. Ed. Mayor, Lausanne (Svissia) -- 18 -- Fr. 10.--
7. G. Bohin, Housséville (Francia) -- 19 -- Fr. 10.--
8. G. Prinz, Bernburg (Germania) -- 20 -- Fr. 10.--
9. Major Tanner, Bern (Svissia) -- 21 -- Fr. 10.--
10. Willy Mildebrath, Bernau (Germania) -- 22, 23 -- Fr. 20.--
11. Ilmari Federn, Köbenhavn (Dania) -- 24 -- Fr. 10.--
12. C.W.v. Sydov, Lund (Svedia) -- 25, 26 -- Fr. 20.--
13. M.A. Fritzsche, Leipzig (Germania) -- 27 -- Fr. 10.--
14. Pastor Erhard, Karlstad (Svedia) -- 28 -- Fr. 10.--
15. B. Blomé, Kristinehamn (Svedia) -- 29 -- Fr. 10.--
16. A. Haldin, Eskilstuna (Svedia) -- 30 -- Fr. 10.--
17. E. Berggren, Stockholm (Svedia) -- 31 -- Fr. 10.--
18. Osk. Dillén, Stockholm (Svedia) -- 32 -- Fr. 10.--
19. Ing. Lindström, Enskede (Svedia) -- 33 -- Fr. 10.--
20. Red. Lindholm, Stockholm (Svedia) -- 34 -- Fr. 10.--
21. C.E. Sjöstedt, Ostersund (Svedia) -- 35 -- Fr. 10.--
22. Yngve Sköld, Stockholm (Svedia) -- 36 -- Fr. 10.--
23. M. Guilbert, Paris (Francia) -- 37 -- Fr. 10.--

Summa - fr. 370.--

Noi calidmen mersia omni subscritores! Tis qui ja payat lor abonnament posse, por devenir garante, inviar nos li diferentie inter Fr. 3,50 e Fr. 10.- o Fr. 7.- e Fr. 10.-. Qui va ancor alongar nor liste?

P.3

LI INSIGNE DE OCCIDENTAL

Pos que li articul aparit in Cosmoglotta, noi recivet ancor li sequent propositiones. Noi peti nor letores queles have un bon idé, continuar li discussion ante votation general.

Sr. Berggren de Stockholm proposi:

"Ni nequel apt figure es presentat, noi tot simplicmen deve far fabricar emblemas secun li proposition de Union: Ergo:

Propositiones de sr. E. de Wahl:

[Occ(idental) L(ingue) I(nternat.) A(uxiliari)]

Sr. Akerman de London scri:

Yo proposi que li insigne de Occidental mey esser un pentacle (o pentagram - 5-puntes stelle) in aure sur blanc funde.

Ti figure es extremmen antiqui quam magic talisman. In modern dies it ha esset adoptet sur national flags, p.ex. de Chile, Cuba, Egiptia, Liberia, Turkia, Unit States, etc., e omnes conosse li "White Star Line". Talmen it have quasi un caráctere international. Támen yo ne memora un tal stelle de aurin colore.

Li facte que Esperanto usa un verdi pentacle vell esser bon simbolisme. Noi vell agnoscer it quam li unesim passu vers un natural sistema. Li verde de it posse representar li verne, durant que li aure es li matur fructification.

On posse adjunter li parol Lingue International e Occidental per micri lítteres. O simplicmen L.I. in li superiori spacies e Occ. in li inferiori spacie; to vell far possibil question e response pri li signification del litteres.

Li aurin efecte es facilmen printat per bronzin incre, o pictet, altrimen per un masse de micri puntes, secun li convention de heraldica. Comprensibilmen por li buton-insignes noi vell usar real aure.

Sr. Ferd. Haller de Meiringen scri:

Yo es contra li adoption del tilde in nor emblema, pro que it da un insigne poc decorativ e ínsignificant.

Mult plu simpatic es me li proposit insigne nr. 2 (in Cglta), to es li sole "occidente se" (= ob-cidente, ex latin: ob-cade = cader vers o contra li horizonte) in li mare. Nam ti insigne es interpretativ e simbolic. Li sole, per su position inclinant indica vers li occidente, de quel li lingues (=radies) del sole es partú li sam in li universe, quam ya anc Occidental va esser e vole esser li sam lingue parlat partú sur li globe. Anc li tilde, per li undes del mare, es representat in it. Pro to yo proposi votar por li adoption del sole por emblema secun li nr. 2 in Cgl. o li nr. 1 o 2, du variantes esquissat de me.

Anc li planiglobe de sr. den Outer plese me mult, e si on es contra li selection del "sole sur li mare", yo vell preferer ti emblema o li variante nr. 3. It vell dar anc un decorativ, sat simplic insigne, li dessine nigri sur yelb funde.

Un bell motive por nor insigne vell dar ancor li esquisse sur li covriment del libre "Occidental, die Weltsprache", to es, li conturas de Europa o del Occidente. Per li figura 4 yo intentet animar qualmen on posse adaptar li conturas

P.4

a un insigne.

Revuante ancor un vez mi esquisses, yo deve confesser, que mi preferentie apartene ante omnicos al "sole" e al "planiglobe"; e li vor?

Sr. C. Varela, Figueras (Hispania) proposi:

Sr. Weinberg (Franca) developa su proposition: un schematisation del arc-in-ciel. Il scri que li arc-in-ciel es un signe de alliantie inter Deo e li homes. On posse anc considerar que li 7 colores del arc-in-ciel es comparabil al 7 lingues principal quel Occidental vole reunir in un sol.

On remarca que li arc-in-ciel oferta un multitá de realisationes e que it have li avantage permisser al diferent gustes exercir se sin forjettar li simbol quel es in li base.

Si pro rasones tecnic li 7 colores del arc-in-ciel ne posse esser printat, sr. Weinberg proposi representar li arc per tri colores fundamental rubi, blu, yelb, e in libres printat in nigri, vice ti tri colores, on posse representar tri stries con li monogramme LI in un angul.