COSMOGLOTTA
Serie B, poligrafat - "INFORMATIONES" - Februar 1937 - Nró 1 (9)
Index del contenete ples vider ultim págine
NOR PROGRAMMA POR 1937
It es custom inaugurar un nov annu per un programma e pie desires por li successe del afere quel on servi. Noi vole sequer ti tradition - e changear it: noi ne *desira* que 1937 *mey* esser un bon annu por Occidental; no, noi *constata que 1937 va esser un grand annu por Occidental*, un annu de un grand salta adavan, comparabil al annus 1922 e 1927, annu del nascentie del lingue e annu del nascentie del Union.
Factes e observationes autorisa a ti audaciosi assertion. Sam quam unquande nor movement esset concentrat in Vienna, it es hodie denove concentrat in Chapelle, u se trova li Institute Occidental, Li Central Oficie e Direction del Occidental-Union, li Secretariatu del Occidental-Academie, li Administration de Cosmoglotta, li Secretariatus de APIS e SAPO, li Redaction de Cosmoglotta-Informationes (desde nu nominat "Cosmoglotta, serie B"); e li Redaction de Cosmoglotta self ("Cosmoglotta serie A") in proxim vicinitá. Li pluparte del essential functiones de nor movement es concentrat in li bell país de Vaud, e noi have nu omni possibilitás por profitar ti concentration por li progresse de nor movement. Inspirat de un confident e ínfrenabil entusiasme, noi va devoer omni nor energie al servicie de nor grand idé, de nor bell lingue, de nor autor, de nor coidealistes - per un parol: de nor movement.
Li munde sta in crise, ma nos li fate apare favorisar. Esperanto suffre li dolores de un acri schisma inter li torso del Universala Esperanto-Asocio e un nov Internacia Esperanto-Ligo fundat del secessionistes. Li restages del Ido-movement es denove dividet per li etern schisma inter conservatores e reformistes. (E it es interessant observar, que mult functionarios de ambi concurrent movementes ha, confidente a nor discretion, abonnat Cosmoglotta.)
Nor movement cresce continuimen e progresse in un statu de max bell harmonie, concordie e colaboration. Con Novial, quel ha aproximat se ye 9/10 a Occidental, liga nos fraternal benevolentie, reflex del amicitá inter prof. Jespersen e sre de Wahl. Li unic punctu pri quel on vell posser plendir, es que li crescentie de nor movement quelcvez aporta un poc tro mult labor a un o altri de nor perseverant e ínfatigabil functionarios.
-1-
Ma nor entusiasme ne fa nos obliviar li realitás del vive: Li ocul entusiasmat ja vide li cert e brilliant fine del via in li clar radies del sole; ma li pedes deve ancor vader mill passus ante que noi atinge it.
Detallies de nor programma trova se in li present e venient numerós de Cosmoglotta B (til nu "Informationes"). Pro to solmen poc paroles:
Ccosmoglotta B (Informationes) va desde nu aparir 6 vezes per annu, alternante con Cosmoglotta A (printat), e regularimen in comensa de chascun mensu; talmen que nor abonnates va desde nu reciver un jurnale chascun mensu - sin augmentation del precie. 16 págines chascun mensu, in sam formate quam Cosmoglotta A.
Noi va editer li desde long desirat lexico Occidental-Occidental junt con un serie de vocabulariums in mult lingues national, in plu un historie del derivation de prof. Berger, parte de un Historie del Lingue International del vis-punctu del scole natural, quel va inter altricos contener li autentic documentes pri li historie del Delegation 1907.
E punctu cardinal, noi va intensificar li propaganda in omni directiones. Forsan unquande un o altri coidealist ha questionat se "Esque vermen mi labor ducte a un resultate? Esque ne tamen omni mi eforties ha esset van?" Hodie li Esperantistes e Idistes have cause por questionar se to. Por Occidental li stadie de dúbite - si un tal ha existet - ha finit por sempre. *Chascun Occidentalist posse fider in li rapid reaction e absolut apoy del Centrale a omni su iniciatives*.
Noi exhorta omni coidealistes a colaboration, a inviar nos idés. Omni colaborator es benevenit, necun mem modestissim laborette va esser perdit. Noi institue durant 1937 un continui concurs de idés, grand o litt, por propaganda, por organisation, por instruction, por labor de buró, por omnicos. Li redaction de Cosmoglotta B va esser jurie, e va premiar omni idé nov, util, e realisabil por Fr. 5.- sviss in Bons del Institute Occidental.
Nor afere es bon, nor position es fort. In li annu passat noi ha atinget considerabil successes, in li nov annu noi va consolidar e augmentar les. Noi comensa li nov annu con un marvelosi sentiment de secur saventie pri nor successe definitiv. Mey nor entusiasme e self-confidentie inspirar anc vos.
1937 es li annu de Occidental - adavan!
Li Redaction de Cosmoglotta B
Ric Berger - Fred Lagnel - Ilmari Federn
-----
Qui desira reciver un Occidental-jurnal duvez per mensu
mey abonnar anc li Occidental-Bulletin de nor tchec coidealistes, quel apari, completmen in Occidental, 10 vez per annu, li 15. in chascun mensu, con exception de julí e august. Precie extra Tchecoslovakia 3 respons-cupones o -.90 cts. sv. Redaction e administration: Occidental-Buró, Skroupova 2, Praha VII.
-2-
CRONICA
COSMOGLOTTA (serie A) va aparir in futur exactmen li 5 januar, 1 marte, 1 may, 1 julí, 1 septembre, 1 novembre. Li nró 4 va esser consacrat a Edgar de Wahl quel have su 70-esim anniversarie li 11 august. - Li nró 112 de Cosmoglotta esset inviat al 300 linguistes, membres del congresse international de linguistes in Copenhag, e a un centene de Idistes (queles ne ja abonnat Cosmoglotta). Redaction de Cosmoglotta B ("Informationes") Desde hodie, li suplement poligrafat de Cosmoglotta va aparir regularimen li 1 februar, 1 april, 1 junio, 1 august, 1 octobre, 1 decembre, mersí al auxilie de sr Federn. Por evitar miscomprenses, noi precise que su redaction es assumat de tri principal persones queles va sempre signar lor articules per li abreviationes sequent:
F.L. = Fred Lagnel, Director del Central Oficie - I.F. = Ilmari Federn, Secretario del Academie - R.B. = R. Berger, Redactor de Cosmoglotta. R.B.
ANGLIA - Nor coidealist S.W. Beer (London) nu traducte a anglés li important scientific studie de Ing. E. Pigal: Essence of Occidental. - Su fratre, L. Beer, prepara un Occidental Vocabulary Simplified. - Noi prepara nu li edition del Vocabularium Occidental-Anglés de Federn, Kemp e Haislund (anunciat sub li nómine de "Clave") juntet con un grammatica de Occidental in Anglés. F.L.
CUBA - De ti insul noi recivet in comensa de januar un carte portant ti paroles printat: "Estimat coidealist: ples accepter nor sincer desires de felicitá por li nov annu 1937, e bon progresse del lingue international Occidental" signat: Dario Bonneval, Rafael Fuentes. - Sincer mersí del Central Oficie. R.B.
FINNLAND - Noi recive li trist information pri li morte de sr Tauno Tattari, li li autor del libre pri Occidental in lingue finn. Noi crede saver que nor coidealist morit pro tuberculose. Quande noi va pesseder detallies, noi va parlar pri li merite de ti modest e valent amico. R.B.
FRANCIA - In fine de februar, sr Martinet, professor de lingues vivent che li lycé de Reims fa tri discurses pri li problema del lingue international. Noi va referer pri su interessantissim enunciationes in li nró 2 de Cosmoglotta B. IF
SVISSIA - Saturdí, 13 febr. ha arivat in Lausanne sr Ilmari Federn, secretario del Occidental-Academie. On memora que sr Federn esset considerat til ante tri annus quam li "max bon stilist de Ido" pro su articules in "Progreso". Hodie
-3-
sr Federn ha decidet se consacrar su tot forties a Occidental e venit habitar Chapelle in li Central Oficie. In facte nor movement nu expande se tam mult, que sr Lagnel sol ne posse plu suficer por li corespondentie. Li generosi auxilie es un ver chance por Occidental, nam talmen va esser centralisat in un sol loc li activitá del Academie e del Occidental-Union. - Sr Federn viageat de Copenhag tra Paris u il visitat srs de Guesnet e Mauney. In Lausanne evenit un unesim conferentie inter srs Lagnel, Federn e Berger per quel un "plan de action" esset etablisset. Durant que ili va continuar li propagande, srs Lagnel e Federn va interprender li publication de mult libres necessi, p.ex. li lexico complet Occidental-Occidental, li grand lexico Anglés-Occidental comensat de nor mort amico Kemp, curses de aprension in lingues national etc. etc. R.B.
Prof. R. Berger, redactor de Cosmoglotta, va sejornar in Paris del 29. julí al 4 august. Il va esser felici incontrar ta interlinguistes. Ples informar le a sequent adresse: Prof. R. Berger, Morges, Svissia.
TCHECOSLOV. Nor tchec amicos queles es instructores, es informat que li tchec revúe "Vytvarna vychova", revúe por li docentie del dessin, just ha publicat in su numeró 2 li traduction ex francés a tchec de un parte del ultim libre de sr Berger, pri li dessin, libre aparit in 1936 in Lausanne. Cosmoglotta ante 2 annus hat publicat un preresumate de ti libre. Nor letores tchec queles interesse se pri ti problema posse obtener li nró 2 de Vytvarna Vychova per scrir a sr Vydra, inspector del dessin, Vazova ul. 1. Bratislava. F.L.
Li propagandistic activitá de nor assiduissim tchec amicos posse esser considerat quam un modelle digni de imitation de chascun landal movement. Noi publica in sequent lor raporte con statistica comparant pri li successes atinget durant li annu passat. - Concernent li nómine del patria de nor fervent amicos, un discussion del Academie, iniciat per ili, havet quam resultate, que li form Tchecoslovacia deve esser considerat quam preferibil. On remarca tamen que anc lettres adressat a Tchecoslovakia va atinger lor destinatario. I.F.
Raporte pri li propagatori activitá por Occidental in Tchecoslovacia in 1936
Por comparation del progresses fat, li númeres de 1935 es juntet in parenteses. Numerós publicat de Occidental-Bulletin: 10 (10). - Suplement: 4 numerós (1) - Exemplares dismisset de chascun numeró: variabil inter 150 e 180. - Númere del abonnates: 72. - Assemblés de Federali: 1 (1). - Club Occidental in Praha, membres: 29 (14). - 1 assemblé general + 12 sessiones del comité (1+10). - Libres editet: 2; Kajs, Occidental, moderní rec mezinádorní e Kajs-Podobský-Svec, Slovník cesko occ. (lexico tchec-occ) (1935: 1). - Nov folies de propaganda: 1; con recension de Occidental de prof. Vanomý, editet de Svec. (1935: 6). - Articules e noticies in gazettes: in 11 gazettes 60 articules e noticies de 7 autores, ne contante litt anuncies pri discurses. Vide separat sinoptica! (1935: 22). -
-4-
Traductiones de original articules in Occidental a tchec: 6; 3 de Deulofeu, 2 de Krogstad, 1 de Poujet, traductet de ing. Polanský in Nezávislá politika. - Un curs de Occidental in li jurnale Nezávislá politika, de Podobský, in nrós 2.-33. fine: 3.oct.1936. - Public curs in Praha, 16 persones, 5 leciones, ductor Josef Svec. - Public discurses: 6 in Praha, Jos. Svec. - Mentiones pri Occidental in libres: 2; Tchec vocabularium Vása-Trávnícek e in Suplement al Enciclopedie Otto. - Visites de foren Occidentalistes: 14-15 marte sr. Brand ex Tavannes in Svissia, 28-29 august sr Ritter ex Chiasso, Svissia; ambi che sr Svec in Praha. - Númere de demandes de information ca. 100 (in 1935: 30). - J. Podobský, J. Svec.
Statistica pri articules e noticies pri Occidental, publicat in tchecoslovac jurnales e revúes, til 31. dec. 1936: in 11 gazettes esset publicat 60 articules e noticies de 7 autores: in Nezávislá politika, Brno, sin contar li curs: 26 - Kraj, Jihlava: 11 - Stráz ceskeého východu, Litomysl: 5 - Pritomnost, Praha: 4 - Sobota, Praha: 3 - Nymburské listy, Nymburk: 3 - Orlicko: 3 - Bratrství: 2 - Východoceský zpravodaj: 1 - Zájmy Hermanomestecka: 1 - Skola mestanská: 1.
Autores: Podobský: 23 - Vozenilek: 8 - Polanský: 7 - Stastný: 6 - Svec: 6 - Scheinpflug: 2 - Kajs: 1 - non-signat: 6.
Noticies pri li discurses e pri li curs, poy pri nor movement in general, aparit in pluri jurnales: Zatecký kraj, Lidové noviny, Nár. politika, Nár. listy, Mladoboleslavské listy, Volná myslenska etc. Jaroslav Podobský
---------
Li noticie quel devet aparir ci, esset dementit in li ultim moment. Ples pardonar! Noi prefere presentar a nor letores un vacuum in vice de un íncorrect information.
-5-
Oscar: Propaganda inter adeptes de altri sistemas e "li defense del idé".
Idistes plendi quelcvez pri que noi propaga inter les: noi mey propagar in publica, ma lassar lor adeptes tranquil. Plende absurd: un grand parte del oficial Ido-politica es li propaganda inter Espistes. *Quo es permisset a Ido, es permisset a Occ*. Noi ne aconosse quel lor labor che Espo es "eclaration in favor del lingual progresse" durant que noi "noce li general idé del L.I. per ínloyal concurrentie". Sam jure por omnis.
*Un grav impediment por public propaganda es li multitá del sistemas*. On di: "Ples unir vos antey, tande noi va vider." Un sol sistema vell haver mult plu grand fortie activ al publica. Pro to li Espistes tace pri altris e pretende esser sol. Li defectes de lor lingue impedi li successe de lor tactica.
*Li rason del existentie del L.I. es esser un e exclusiv*. Pluritá de L.I. es absurd. *Do li L.I. deve unificar se*. Til nu li provas unificar per convention e colaboration ne havet ancor successe, exceptet inter Occ. e Novial. Por li rest sembla possibil solmen combatte, propaganda, discussion, polemica til superviventie del max fort. Tis queles have li max bon sistema e posse defender lor conviction per veritabil argumentes, have mem un *sacri deventie unificar li L.I. per absorpter li altri movementes*, ante comensar li lucta final in li publica.
Li Idistes save bon, que ili self ha fat a Espo, quo ili nu suffre de nos, e Espo ha fat it a Volapük. Ili ne mey concluder que un nov sistema vell far sam a Occ. Ti argument es li scruv sin fine (Idido, Ididido) inventet del Espistes por ne transir a Ido. Til nu tal lingue ne ha venit. It vell esser desfacil superar li 30 annus de labore investit in Occidental!
Un Espist scrit a un Idist: "Mem si Ido vell esser plu bon, mem li max bon sistema ne vell posser compensar li damage fat al idé del L.I. per continui invention de nov mundlingues. Pro to por me existe solmen Espo - o li idé del L.I. es un utopie. Li idé es lu cardinal - li combatte pri li sistema es li max grand dangere por li idé." Hodie Espo "defende li idé". In su revolutionari yunesse, it incontrat just ti argument che li Vpkistes. 1889, Zamenhof scrit in "La Esperantisto", nró 1: "ili estas konvinkitaj, ke la enkonduko de nova sistema, kiel ajn bona gxi estus, metus en dangxeron la tutan estontecon de nia idea". It ne surprisa audir ti Vpk-argument de Idistes queles crede se justificat per li decision del Delegation. Li historie repeti se, ma li repetitores ne save it. Li justificatives (Esperanto jam venkis - Ido linguo dil Delegitaro) varia, li pretension resta li sam.
Li argument contra Occ: que anc it vell unquande "defender li idé" contra un nov sistema superior, implica li confession que "defender li idé" es solmen un vacui pretexte por justificar sistemas antiquat contra lingual superioritá.
No, ne contra un imaginari futur sistema - it es hodie: it es a Espo e Ido, que noi di: "Noi defende li idé! Esperanto e Ido repugna li publica e da it un fals impression del idé del L.I. Ili ha ganiat plu adversarios quam amicos al idé!"
-6-
Cinta Ro: Esque li propaganda "menti"?
Concernent omni problema existe argumentes queles vale. Li experte comprende les, e ili decide su atitude. Chascun es expert in su specialitá e laico in altris. Por chascun problema do existe un minimal minorité de expertes e un aplastant majorité de laicos. Li veritabil argumentes ne fa impression al laico pro que il ne es capabil comprender e judicar les. Li laico do va judicar un afere ne secun li argumentes valent, ma secun un superficial e naiv aparentie corespondent a su ínsuficent experienties.
Mem li max bon afere (p.ex. li lingue international) ne have valore, si it ne es aplicat. Por adequat aplication it besona li masses. Omnicos es judicat secun li successe. Li publica ne comprende intrinsic bonitá. It pensa: "To ha successat - do it es bon." Ne to quo es bon have successe, ma to quo have successe es considerat quam bon. Paradoxalmen formulat: "Li successe ne depende tam del bonitá quam li bonitá del successe." Por successar, un afere deve aplicar li medies queles ducte al successe. To es precipue propaganda, propaganda al masses.
Li argumentes queles gania li masse es sovente naiv e facilmen criticabil o refutabil per li experte. Li argumentes queles gania li experte sovente ne impressiona al masse. Null argument have veritá universal, ni vale partú. Chascun argument vale solmen in su sfere, quel posse esser plu o minu ampli. Pro to omni argument quel vale quam veritá in un sfere posse esser refutat, si on prende un altri sfere quam base de refutation. To es li essentie del tese: "omnicos posse esser refutat."
E in ti considerationes ne mem es egardat li tendenties ínobjectiv: fanatisme, interesse material o personal, passion, ignorantie, ciecitá, desir restar victor etc. es factores instigant un person refusar li veritá. Anc sin li presentie de tal factores, un discussion posse esser steril e ínfinit, pro que li argument suprem in un sfere es refutabil in un altri.
On demande que li aferes deve haver successe. Por successe es necessi far propaganda. Por propaganda es necessi argumentes queles sovente in veritá ne es valid. Nam solmen li expert judica un afere secun li criteries del afere; li masse have su propri, sovente simplic naiv e primitiv criteries, e pro que it presc sempre es plu fort, it fortia li afere adaptar se a les. Pro to omni successosi argumentation es refutabil.
Tamen existe honest argumentation e demagogic argumentation. Li observation, que null propaganda es 100% veraci, que null propaganda es 100% ínrefutabil, ne es un certificat de etic licentie por consciosi demagogos: li diferentie es un diferentie de gradu.
Null land es sin criminalitá. Ma on va judicar diferentmen li standard moral de un land, u de chascun million inhabitantes cent sede in prison pri assassination
-7-
o furte, diferentmen un land u chascun million de population contene tri mill crimineros.
To vale anc por propaganda e argumentation: decident es li gradu del honestitá e objectivitá in li propaganda.
-----
Veritá permanent:
Un jurnale posse ameliorar se solmen si li númere de su letores augmenta. Con ili augmenta su fontes material e li rádius de su influentie. Talmen it posse ofertar plu considerabil servicies.
Si nor abonnates es content pri "Cosmoglotta" e pri "Cosmoglotta-Informationes", ili mey dir it a lor amicos. Noi mersía les anticipatmen e cordialissimmen.
-----
Ex-Esperantist Rädler: Congresse de 50000 Esperantistes
Nor samideanes esperantistic sembla esser plu quam optimistic. Nam on va manifestar li 50-esim anniversarie del existentie de Esperanto in ocasion del "XXIX. Jubilea Kongreso", quel es convocat ho-annu a Warszawa (Polonia). Pro to li local congress-comité (sub honorari presidie de prof. dr. Odo Bujwid) ha publicat su extrem-optimistic opinion in li comunication aparit in "Aústria Esperantisto - 5.II.37" (forsan anc in altri gazettes esperantic) per sequent lineas:
"Grand successe vell esser, si *va* (ne "vell" - li scritor) partiprender 50000 Esperantistes ex li tot munde! E poy li radio *va* far audient: "Eksterordinara en la historia de internaciaj kongresoj: kongreso de Esperanto en Varsovio kun 50000 kongresanoj el la tuta mondo; Enkonduku Esperanton en la lernejon, Esperanta Ligo de Nacioj."
Nu - certmen on ya es rect per ti suposition, pro que ja plu quam - 100 (in lítteres: cent) persones ex 16 landes ha anunciat se. Ergo - manca ancor minu quam 49900. It ja es ancor mult témpor...
Esperanto en la moderna vivo
Sub titul on trova in "Aùstria Esperantisto" (5.II.1937) quelc comunicationes de Steiner pri li "Internacia Konferenco" (Paris, 14.-17. may 1937) - quam protector es nominat li presidente del state, Lebrun - in quel on publicmen fanfarona per "La Konferenco 'Esperanto en la Moderna Vivo' montros per siaj kvar komisionoj (I.E. en la lernojoj; II. Internacia Trafico; III. Sciencoj kaj Teknikoj;
-8-
IV. Intelektaj Intersxangxoj.), ke Esp. ne plu estas utopio, sed ke gxi jam funkcias kiel praktika ilo por cxiuspecaj internaciaj rilatoj, ke problemo de lingvo internacia ne plu ekzistas, ke *ne pli estas eble konsideri konkurentojn* de Esp., unuvorte, ke Esp. sole estas de *nun la sola internacia vivanta lingvo* apud la vivantaj lingvoj de la diversaj popoloj."
Esque li titul ne vell esser plu corect: "Espon en la moderna*n* vivo*n*, nam E. ya ancor ne es usat in li modern vive, it do va dever solmen *intrar* in ti vive, quo es tre dubitabil. Anc li problema del L.I. es soluet per - Occidental, quel noi - malgré li assertion esperantistic - considera in presente quam concurrent de Esp., ma in futur it va esser victor sur li camp del L.I.
Remarca: Pur brue augmentat, li organes landal de Esperanto prova detraer li atention del acri, desastrosi schisma, quel reye li movement international. It hodie ne es question, esque Esperanto have concurrentes o ne, ma quant long ancor Esperanto self va continuar esser un seriosi concurrent por nos. Pos li bankrott del UEA, pos un processu pri su centrale in Genève, li Esperantistaro es fendet in du partis: li torso del UEA e un nov-fundat Internacia Esperanto-Ligo. Durant li duesim demí del annu passat, lor organes "Esperanto" e "Esperanto Internacia" esset plen de amari ataccas e reproches lamentosi. In li proxim numeró de Cgl.-Inf. noi va dar a nor letores plu detalliat information pri li
Schisma de Esperanto Red.
-----
Re-edition del ancian numerós de "KOSMOGLOTT"
In li ultim témpor accumula se li demandes pri ancian numerós de "Kosmoglott" 1922-26, e quelc serchantes oferta payar altissim precies. Regretabilmen presc omni desirat numerós es completmen exhaustet e ne plu recivibil. Evidentmen li serchantes divide se in du gruppes: Colectores del veritabil ancian exemplares, e Interessates pri li valorosi ancian articules. Li unesimes noi ne posse contentar, ili deve provar lor chance per anuncies, til que trova se un exemplare comprabil ex possession privat. Al duesimes noi torna nos hodie:
Li Institute Occidental ha considerat un poligrafat reedition del ancian numerós de "Kosmoglott" in li sam formate. Cuidat examination del question ha dat li resultate, que reedition del integri numerós vell esser ínutil, pro que li ballaste de noticies unquande actual, de anecdotes, de lingual discussiones pri questiones antiquat, hodie ne interessa plu. Ma sempre va restar interessant li articules de sr de Wahl pri li grand e essential questiones de nor lingue e de nor movement. Pro to li Institute Occidental ha decidet publicar li complet serie 1922-26 de ti articules de permanent valore sub li titul:
SPÍRITU DE OCCIDENTAL
de Edgar de Wahl
Chascun articul va esser reviset e eventualmen retuchat e completat de sr de Wahl self, e va esser reeditet in cuidat redaction in li hodial form de Occidental, con precis indication de annu, numeró e págine del originale. Ti collection va esser un preciosi manuale por comprension del vivent spíritu de nor bell lingue, ex li competentissim plum de su autor. I.F.
-----
Al membres del Occidental-Union
Noi peti omnis queles ja ha payat lor contribution por 1937 o anunciat lor adhesion per lettre, ancor plenar li *yelb carte de adhesion* e inviar it a nos - si ili ne ha fat to ancor. LI yelb carte in nor cartoteca es li assecuration por nor membres que noi have lor adresse in bon órdine. Por chascun, li plenation del carte custa poc minutes e li expedition poc centesimes. Por nos, copiar omni noticies de lettres o sur li mandat-cupones vell esser un long e penosi labor, quel vell raubar li témpore de plu valorosi labores.
Ples plenar e inviar nos li yelb carte strax!
Li Central Oficie
Coidealistes, queles desira, que lor adresses mey esser publicat in li adressarium de APIS, ma queles ne desira obligar se responder a omni corespondentie, quel ili eventualmen vell reciver, es petit, plenar e inviar nos li verd carte de adhesion a APIS, con trastrecation visibil del paroles "obliga se responder" e con un clar visibil indication "ne responde". Li adressarium es in preparation. Ples inviar strax! Li Secretariatu de APIS
-----
Decocte de amore - Balcanic historiette
Un paisana venit in li apoteca de un litt cité de Yugoslavia. Ella plendit que su marito adultera con un flicca in li cité. Ella petit li apotecario pri un decocte de amore por detornar li mann de su rivala e retroducter le a su matrimonial deves.
"Null anxie", respondet li apotecario, "omnicos va esser in órdine"; il dat la un flacon; su contenete ella mey dar al mann, con fort café o aquavite.
Pos quelc dies li paisana con beatissim visage venit denove in li apoteca e aportat un grand corbe con magnific pomes. "Mey ili far te bon, tu es un diabolon! Mi Miloye ne ha eat al mercate e ne havet su randevú con li Radakya. Il ne posset vader, il devet sempre hoccar..." (Trad. A.P.)
-10-
Li schisma de Ido
Ric Berger: Li ultim duplicitá de De Beaufront
Li secretario del Ido-Union, sr Heinz Jacob, de quel noi discusset li ovres in nor ultim articul in Cosmoglotta A nró 111, just publica un circulare in quel il proposi reformar li derivation de Ido secun li postulation del "modern interlinguistica".
Li presidente del Ido-Academie, sr Quarfood, exhibi sur 4 columnes de Centerbladet su indignation contra ti iniciative, usante argumentes de queles li debilitá es apen credibil.
It esset facil a sr Quarfood demolir linguisticmen li propositiones de sr Jacob per pruvar que it es ínpossibil reformar li derivation idic sin transformar completmen li lingue e abandonar su base esperantic.
Ma sr Quarfood ne trova plu bon argument scientic quam ti ci: "la klasika Ido", quam si ti epitete de "klasika" sufice por far un lingue tabú! - Anc Esperanto in 1907 esset "klasika", quo ne impedit De Beaufront reformar it!!!
E quam ultim argument sr Quarfood cita ti declaration de De Beaufront inviat in 1927 a "ul autoro" (probabilmen sr Pesch!) in quel li doctor in teologie dit: Occidental es fush-laboro (fushar = bosillar, laborar mal in grand hasta).
Ma in li sam epoca yo self recivet un carte (quel yo possede ancor) del sam De Beaufront in quel ti-ci, parlante pri Occidental, nominat it in francés "l'élucubration de Wahl". Tis queles conosse francés, save que élucubration significa: ovrache composit per tro mult labores e vigilies.
Per to on posse judicar li scientie de De Beaufront, quel ne hesita declarar in li sam moment a un de su corespondentes que Occidental "es mal pro que it es un labor tro rapidmen fat" e al altri corespondente que Occidental es mal ancor pro que *it besonat tro mult témpor*!! Du argumentes exactimen contrari!!! Quem do De Beaufront mocat ci: Pesch o me? Adver ti duplicitá che ti hom ne es astonant quande on conosse su atitude che li Delegation, ma it sembla nos que sr Quarfood vell dever trovar altricos quam citar li judicie de un autor tam poc seriosi.
In realitá, li epitete de "fush-laboruro" es li sol quel un hom competent ne posse aplicar a Occidental, nam E. de Wahl comensat elaborar un lingue naturalistic ja in 1894 e continuat su labore til 1922. On posse sequer li successiv resultates in omni revúes interlinguistic de líber discussion a queles E. de Wahl colaborat. (Comparar li cronologic sinoptica in Cgl-Inf. 1936, nró 4.)
In revancha, null lingue merite plu bon li acusation de "fush-laboruro" quam Ido, nam li famosi comité del Delegation besonat solmen 2 1/2 dies in octobre 1907 por studiar Ido e adopter it! E pos to, De Beaufront e pos le sr Quarfood acusa Occidental esser un fush-laboruro!
-11-
Adplu li opinion de De Beaufront have tam poc importantie, que noi posse solmen rider pri it. Esque sr Quarfood ne posse citar un autoritá minu mesquin?
***
Ilmari Federn: Li cent fideles de sr Quarfood
Li acritá con quel sr Quarfood atacca sr Hz Jacob, apare ínproportionat al crímine: li sol question esque on deve restudiar li sistema del derivation de Ido. E it es ínmeritet. Yo conosse sr Jacob desde nor comun yunesse quam archiconservativ in linguistic questiones concernent li structura de Ido. Si il hodie comensa dubitar pri un important de ti structura, on deve concluder, que to ne es un subit capricie, ma li tard resultate de un evolution in saventie sub li urgent pression del interlinguistic realitás de nor epoca.
Unquande reformatori adversarios reprochat al familie Jacob que lor lingual conservatisme es causat per lor stock de vendibil litteratura. Li conservativ adversario sr Quarfood, quel conosse ti reprocha, vell posser dir se, que sr Jacob ne vell sacrificar li valore de ti custosi litteratura, si il ne vell creder que un reform es li ultim possibilitá por dar ancor un chance a Ido.
Sr Q. mey continuar li traduction de grec poemas e li hellenisation de Ido. To es ínnocent plesuras. Ma il mey lassar in pace li questiones, por queles li bon Deo ne ha dat le li competentie simultanmen con li bell oficie. Li questiones del "politiko en Internacionia" ne es soluet per pátos teatral o per exhibition de titules e functiones. - Ma su rasonament: Quel naiv confusion!
Avan me jace li noticies fat pos un conversation con sr Q. brevimen ante mi transition de Ido a Occidental. Il ne ha changeat interim. Il ne ha aprendet necos in ti tri annus. Ja tande il ne volet comprender li realitás. Ja tande sincer dúbites e scrupules esset por le identic con destructiv malevolentie e trahition. Su trump suprem esset:
"Qui ne es content, mey ear a altri sistemas. Yo va restar ductor del restantes. Yo prefere restar con cent fidel Idistes, ma yo ne va tolerar trahitores in nor movement!"
Un bell e efectiv movement, li cent fideles de sr Quarfood! In facte, quelc mensus poy, al election del comité, quel fat sr Hz Jacob secretario del Union, partiprendet 103 membres del Ido-Union. Compatibil Heinz Jacob! Tande il ne vell har imaginat, que anc il va bentost figurar sur li nigri liste del ductor del classic Idistes!
Sr. Q. honora me per mention: "Sro Federn, qua pose transiris ad Occ. relatis IALA." Ah, li confusion, quande il surti ex li sanscrit-grammaticas! Si il vell un poc informar se pri "la politiko en Internacionia", p.e. per leer Cosmoglotta e mi raportes pri li conferentie de IALA in Copenhag, il vell posser dir
-12-
se, que it ne posse esser IALA self quel ha instigat me transir a Occidental, e que it es extremmen ínprobabil que just IALA ha instigat sr jacob proposir un restudie del Ido-derivation durant que it self completmen tace pri li derivation in general!
Yo confesse, que yo anc havet un tal nominat "personala motivo" por transir a Occidental: It esset - pos li conversation con sr Q. - li profund desesperantie pro li manca de ver ductori personalitás in li Ido-movement, li prevision, que li democratic republica del Ido-movement, scene de jalusi rivalitá inter divers "ductores" in formate de tasca de gilete, esset condamnat al morte. Li cámfor-injuctiones del moné quel suporta li edition de "Centerbladet", prolonga li agonie, ma ne banni it. Sr Q. ha nu inaugurat li simptomas del cramp letal.
Su rasonamentes pri IALA, Occidental e altricos have tam grand relation al realitá, quam li romanes del german yuness-autor Karl May, quel descri foren continentes u il nequande ha esset. Por sr Q., Occidental es un continent tre foren, in quel un real expedition il til nu ne ha audaciat far.
Yo venit a le con li articul de sr Berger in Cosmoglotta 93: "Idistes, un altri son de cloche!" e accentuat que ti articul e li rest del numeró quel esset dedicat a Ido, es un fortissim critica. Li classic response esset: "Yo ne cuida pri Occidental!"
Yo parlat con li eloquentie del desesperantie: que tal response ne auxilia me; que yo ne posse responder a ti atacca; que il, convictet pri li bonitá del fundament de Ido, deve dar nos apt armes por defender it; on cita grav argumentes contra nos; esque Vu ne vole refutar les por auxiliar nos, Vu, nor presidente e max alt linguistic instantie. Quo Vu intente responder?
E li ductor del cent classic Idistes respondet me: "Necos - yo ne have témpor - yo ne posse refutar omnicos quo es scrit - quo ili posse far?! - ili es forsan quinant."
In fact, quinant Occidentalistes vell esser solmen li demí del cent fideles! Ma esque on es blamabil, si on dubita pri un doctrina, de quel li grandprestro in tal maniere refusa defender it, quande on implora le? Dúbit es un crímine in su ocules, ma yo ganiat li conviction, que il ne posse defender Ido contra Occidental.
Ancor hodie, sr Q. "ne cuida mult pri Occidental", e li cent fideles contenta se per li facilmen obtenibil repetition del parol "fush-laboruro" in vice del seriosi defense, a quel senior li presidente de lor Academie ne es capabil.
Noi Occidentalistes, queles hodie ha largmen trapassat li númer del Idistes, ne cuida mult pri li cuidas o ne-cuidas del ductor del cent fideles. Tamen, forsan, li aventuras passat e present del Ido-Akademiestro ha amusat nor letores. Advere por li cent fideles it es li catastrofe final. Sr Q. ne mey serchar li cause de su ínquietitá in alquel mistic adversari francmassoneríe. Il mey trovar it in su propri ínpotentie.
-13-
Remarca redactional: Noi avisa nor letores, que to es probabilmen li ultim vez, que ili vide tractat in Cosmoglotta un afere de Ido in tal amplitá. Mem si sr Quarfood vell replicar o - ínprobabil miracul - scrir un veritabil critica pri Occidental, quelc lineas va suficer al importantie de tal eveniment. Noi considera li historie de Ido quam tendent rapidmen vers su fine, e li cent fideles de sr Quarfood va certmen esser nos grat, si noi invelopa li ultim trist capitul de lor historie per li charitativ mantel del silentie, e permisse les morir in pace... adver ne in pace intern. F.L.
-----
Ancor un vez li yelb cartes del Union!
Noi fa atenter, que li plenation e inviation a nos del yelb cartes de adhesion al Occidental-Union ne es solmen un act quel economisa nos labor, ma un legal necessitá. In casus de dúbite, esque vu es membre del union o ne (p.e. ye electiones), ne decide li payament, ma solmen li explicit adhesion con vor signatura.
-----
Li fabrication del insigne de Occidental, tilde in circul, in metalle, ha esset cuidosimen examinat. Noi sta in comunication con un grand fabrica, e espera posser bentost comunicar vos detallies.
-----
Pierre de la Gorce: Li potentie de un sol hom
On ne imagina to, quo bon o quo mal posse far un littissim manuade de homes, si ili es unit, e have perseverantie e corage. In un region quel yo conosse bon, yo videt in un duantene de annus un canton bonissim devenir mal per li influentie de solmen tri homes.
E invers, in li sam region, yo videt un altri canton presc subitmen retornar del mal al bon per li action ne de tri homes, ne de du homes, ma de un sol, quel desfortunosimen morit tro bentost, ma quel savet voler e quel precipue savet audaciar.
Ne di nequande: "Ci on ne posse far necos!" To es li linguage del egoistes o almen del debiles; to es li linguage de tis, queles ne trova nequande li hore favorosi e queles, quande mem li fructe vell cader del árbor, vell trovar ancor que it ne es matur.
Do ne di nequande: "Noi va esser victet!" (trad. F.L.)
-----
Li heróe sercha li action gloriosi, il lucta con corage til su morte anc por un cose perdit - li sagio prudent examina li circumstanties, quande il vide que su cose es sin espera, il aplica su forties a altri scopes plu util. (Chinés)
-14-
EX LI PAPER-CORB
Li spacie de Cosmoglotta es limitat. Li paper-corb redactional es considerabilmen plu spaciosi. Li natural consequentie de ti quantitativ relation es, que plu mult de nor paperes migra in li vast obscur regiones queles extende se sub li tropopulat territoria del scri-table del redaction. Ta infra, in li purgatoria, ili atende ear li via de omni papere, in li inferne del forne, o altriloc. Ma quelcvezes ti paperaches, pri queles li redaction ne vole prender li responsabilitá, acumula se in in gradu menaciant li redactores per risca de submersion.
"Quo far?" questiona li unesim. "Inviar it a Centerbladet", proposi li duesim, "ili printa omnicos quo ili recive!" Ma li chefredactor advoca Miquette, su tri-annual filietta: "Miquette, prende quelc pezzes de ti papere." Miquette, quel ama prender papere quande ínobservat, misfide al explicit permission: "Papá", ella responde, "noi ja have tufficent in li..." Li papá repeti severmen: "Ples prender un poc de ti papere!" Ma Miquette have un volentie de ferre. "No!" ella nettmen refusa, e mettente su pollic in li bocca, cela cela su visage per un demí-torn.
"Tu va reciver un pezze de chocolate!" - Li ferre amolla se. Li rosi rond manuettes merse in li mar de papere e capte con cris de triumf tri o quar manuscrites. "Ples li tocolat, papá!" Ella recive su honorarie e surti jubilante con un brun barbe crescent circum su rubi labiettes.
Li redaction resta con li salvat paperes. "Li voce del fate ha parlat", di li chefredactor solemnimen, emoet del significantie del scene, "on va publicar ti manuscrites!" - E ci ili es:
Li trist ballade pri li grand chef del indianos del nordic forestes...
Li indianos del nordic forestes
possede un chef eminent;
e tribe e chef es consciosi
del propri vertús excellent.
Li tribe del nordic forestes,
it vive in contemplation
de su valor ínsuperabil -
in su propri opinion.
Lor armes es haches e furcas
e lanses con quelc ferruin,
lor mannic corage furia
- in cantes pri guerre sanguin
Ma ve, ti tre bravi guerreros
ne fa impression imposant
al occidental ínamico
quel veni con arm conquestant.
Un yun indianic guerrero,
per un ball de fusil atinget,
raporta al chef pri terribil
machines audit e videt.
Li grandchef del nordic forestes
responde con fier nobiless:
"Ti blanc-faciates es canes!
Yo vermen ne cuida pri les."
-15-
"Senior, to ne cura mi vúlner!
Noi deve do nos defender,
e Vu, nor grand chef, per fort armes
Vu deve nor land protecter!
Li grandchef caressa su barbe
e di per su voce sonor:
"Tu dúbita pri nor valore
e armes, mesquin trahitor?
Qui es íncontent, mey con pace
al occidentales ear,
ma yo, in li nordic forestes,
trahitores ne va tolerar!"
Li grandchef del nordic forestes,
il di it con pátos tuchant:
"Cent mey del fideles restar me,
e yo lor ductor conservant!"
Li yuno con lácrimes parla:
"Noi deve fusiles comprar,
e Vu nor ducter al defense.
Ples dir, chef, quo vole Vu far?"
"Necos!" es li classic response,
"quo ili do posse nos far?
Quinant ili es, o mem minu,
e qui posse nos superar?" --
Li yuno, il mori vidente
su patria abandonat. -
Sub tónner del blanc cannonadas
it es invadet, conquestat. -
Victet, mult indianic guerreros
transí al armé del victor. -
Cent fideles in nordic forestes
A lor grandchef retorna ancor. -
Lontan in li nordic forestes
- nam li blancos ja reye partú -
ili canta li classic legendes
pri lor ínsuperabil vertú. Farfarello
-----
Un Ido-lecion
Ni esas sincera amiki / di vera honesta kritiki. (ni = noi, di = de)
Ma vortin qual' "fush-laboruro" / citar, esas chara plezuro. (vorti-n = paroles, acc. Sin n, un Idist vell creder que li paroles cita se self.)
Nam qua nin grosiere atakas, / recevas respondo qua krakas.
Tre laute resonas la frapo / qua falas sur vakua kapo.
Ex-Idisto
fush-laboruro: vider explication altriloc in ti numró. chera = custosi. qua = qui, quel. nin = nos. laute = altmen, fortmen. frapo = frapp, colp. falas = cade.
-----
Contene: Nor programma por 1937 - Qui desira reciver un Occ-jurnale duvez per mensu? -- CRONICA: Cosmoglotta, Anglia, Cuba, Finnland, Francia, Svissia, Tchecoslovacia - Dictionarium del international paroles - Propaganda inter adherentes de altri sistemas e "defense del idé" - Esque li propaganda "menti"? - Congresse de 50000 Espistes, Espo en la moderna vivo - Re-edition de Kosmoglott - Al membres del Union - Decocte de amore - LI SCHISMA DE IDO: Li ultim duplicitá de De Beaufront - Li cent fideles de sr Quarfood -s Li yelb cartes del Union - Li potentie de un sol hom - EX LI PAPER-CORB: Li trist ballade pri li grand chef del indianos del nordic forestes - Un Ido-lecion.
Cosmoglotta Serie A + Serie B = 12 numerós per annu custa junt solmen SFr. 3.50!
-16-
No comments:
Post a Comment